Ойрхи Дорнодын хойг дээр орших Арабын Нэгдсэн Эмират Улс нь 7 Эмират мужтай. Түүний нэг болох Дубай хот нь улсынхаа хамгийн их хүн амтайд тооцогддог, харин газар нутгийнхаа хэмжээгээр нийслэл Абу Даби хотын дараа 2 дугаарт ордог. Элсэн цөл дэх баянбүрд хэмээгдэх Дубай хот нь газрын тосны баялагаа ашиглан хэдхэн арван жилийн дотор маш хурдацтай хөгжиж дэлхийн хэмжээний хот болж чадсан юм. Орлогын эх үүсвэр нь анх газрын тос байсан бол одоо аялал жуулчлал, нисэх хүчин, үл хөдлөх хөрөнгийн бизнес, банк санхүүгийн үйлчилгээ зэрэг нь санхүүгийн гол хөдөлгөгч хүч нь болоод байна. Дубай хот нь сүрлэг өндөр барилга байгууламж мөн хүний гараар бүтсэн хиймэл арал, тансаг зэрэглэлийн зочид буудлууд, томоохон худалдааны төвүүдээрээ алдартай. 

АНЭУ-ын эдийн засаг, аж үйлдвэр, улс төр, соёлын төв болсон нийслэл Абу Даби хот нь Персийн булангийн T хэлбэртэй арал дээр байрладаг улсынхаа хамгийн том газар нутагтай хот ба ойролцоогоор 200-аад жижиг арлуудыг багтаасан байдаг. 1970-аад оны үед 600,000 хүн амтайгаар төлөвлөн хотыг байгуулж байсан. Сувдны бизнес, худалдаа наймаа Абу Дабид нилээн явагддаг байсан ба 1930 оноос сувдны худалдаа зогсож газрын тос олборлох болсон. Дэлхийн газрын тосны нийт батлагдсан нөөцийн 9.8%, байгалийн хийн 4.6% нь АНЭУ-д байдаг бол үүний 90% гаруй нь Абу Дабид байдаг ба ДНБ-ий 56% нь бүтээгддэг мөн түүнчлэн улсынхаа хамгийн баян хот юм.